لقاء فى شارع الثورة.

[dalal.sobhy]

قرأت هذه الكلمات لـ بلال فضل
أعجبتني وأردت أن تقرأوها معي.
*****************************************
لقاء فى شارع الثورة
بقلم بلال فضل 29 / 7 / 2010
******************************
■ المذيعة: مساء الخير عزيزى المواطن.. تحب حضرتك تشترك معانا فى البرنامج؟
ـ المواطن: على حسب الاشتراك بكام؟
■ آه ده شكله عسل وهيتعبنا.. يا فندم أنا قصدى تشترك معانا برأيك.
ـ والله يافندم أنا لو كان عندى رأى أحب أحتفظ بيه لنفسى.
■ حضرتك مكبر الموضوع ليه.. ده برنامج إذاعى بنحتفل فيه بذكرى الثورة.
ـ يا فرج الله.. هى الثورة قامت أخيراً؟.. والله ماحد قال لى.
■ لا حول الله يارب.. عزيزى المواطن إحنا بنتكلم عن ثورة يوليو بتاعة الزعيم جمال عبدالناصر.
ـ أيوه عارفه.. جمال عبدالناصر مبارك.. شاب أمير وربنا هينصره علينا إن شاء الله.
■ لا مش هينفع كده خالص.. شوفوا لنا مواطن تانى والنبى.. عشان اليوم المجيد ده يعدى.
المعد: باقولك إيه يا هانم.. ده المواطن المتاح دلوقتى.. مشى حالك بيه لحد ما نلاقى غيره.
ـ يا فندم حضرتك متعصبة ليه.. أنا باهزر معاكى.. حد ما يعرفش ثورة يوليو.. مش دى اللى ثورة أطلقها جمال.. وإحنا حفرنا القنال وبعدين حررناه وبنفكر نبيعه دلوقتى.. أنا راكب معاكى فى البرنامج.. اتفضلى.
■ الصبر من عندك يا رب.. حضرتك ممكن نبتدى نسجل بس أستسمحك الإجابة تبقى على قد السؤال.
ـ والنبى البرنامج ده هيبقى عسل.. إنتى بس شوطى وربنا هيكرمنا.
■ المذيعة: أعزائى المشاهدين كل عام وأنتم بخير.. فى هذا اليوم المجيد نزلنا إلى شارع الثورة لننقل فرحة المواطنين بهذا اليوم التاريخى الذى غير وجه مصر.. التقينا بأحد المواطنين وسألناه عن رأيه فى مبادئ ثورة يوليو؟
ـ هى ثورة يوليو عندها مبادئ. والله ماكنت أعرف.
■ أيوه يا فندم ثورة يوليو عندها ست مبادئ.
ـ يا عينى.. ده الواحد مننا بيبقى عنده مبدأ بيطلع عينه فى الزمن ده وهى عندها ستة.. الله يكون فى عونها.
■ إيه اللى حصل للناس بس يا رب. يا سيد يا محترم مبادئ يعنى أهداف.
ـ والله.. يعنى الثورة عندها ست أهداف زى الأهلى كده.. وجابتهم فى مين؟
■ ماهو ده السؤال يا فندم؟ فى رأيك كابن من أبناء مصر بعد مرور ٥٨ عاماً على الثورة ما الذى تحقق من أهداف ثورة يوليو؟
ـ إنتى مش بتقولى إنها جابت ست أهداف خلاص.
■ يا بنى آدم إفهم الثورات غير الماتشات.. الثورة بتيجى بأهداف وبعد كده بتحققها. فهمت؟
ـ أيوه فهمت.. يعنى فى الماتش بنلعب عشان نحط الهدف.. فى الثورة بنحط الهدف وبعد كده بنلعب فيه.. والنبى ماتتنرفزى يا ست هانم.. أصل أنا والله أول مرة أسمع حكاية أهداف الثورة دى.. حضرتك قولى لى الهدف وأنا أعلق لك عليه بعون الله.
■ معقول برضه.. بص يا سيدى أول هدف من أهداف الثورة القضاء على الاستعمار وأعوانه، إيه رأى حضرتك فى هذا الهدف؟
ـ أرجوكى اعذرينى أنا ما احبش أجيب سيرة الاستعمار.
■ ليه إن شاء الله؟
ـ عشان أعوانه هيزعلوا.. وزعلهم أوحش من زعل الاستعمار ذات نفسه.
■ إنت غريب قوى على فكرة.. بلاش الاستعمار.. عندك مثلا من أهم أهداف الثورة كان القضاء على الاحتكار وسيطرة رأس المال على الحكم.
ـ من فضلك أنا وافقت أسجل على أساس إن ده برنامج تاريخى.. ومش هتجيبوا سيرة أحمد باشا عز وحديد عز.. أنا عندى عيال وعايز أعالجهم.
■ إيه علاقة أحمد باشا عز وحديده بالموضوع يا أخينا.
ـ مش بتقولى احتكار.. عايزه تخلينى أقول الكلام اللى بيقولوه عليه بتوع المعارضة إنه محتكر الحديد عشان هو صاحب جمال مبارك وأمين تنظيم الحزب الوطنى.. بصى بقى أنا شاكك فيكو بصراحة.. انتو من قناة إيه.. معاكو كارنيهات.
■ ييه ده هيقلب دماغنا.. بلاش يا سيدى الهدف ده.. خلينا فى هدف غيره.. عندك مثلا هدف القضاء على الإقطاع.
ـ حضرتك بتتكلمى عن الثورة الفرنساوية ولا ثورة يوليو.. ممكن تورينى كده الورقة اللى بتقرى منها.
■ من فضلك ممكن تعلق على الهدف وانت ساكت.
ـ إزاى يعنى.. أعلق وأنا ساكت إزاى؟
■ قصدى تتكلم فى صلب الموضوع.
ـ ما هو معلهش يا ست هانم.. إنتى عماله تقولى لى قضاء على الإقطاع وتحقيق العدالة الاجتماعية بين طبقات الشعب.. إنتى مش عايشه معانا فى البلد.. أنا حاسس إنك بتتبلى على ثورة يوليو وبتلزّقى لها أهداف من وراها.. أصل يعنى لو ثورة يوليو كانت بتهدف للكلام ده ماكانتش هتقعد ٥٥ سنة من غير ما تحققه.
■ طب خلاص خلاص أنا هاختار لك هدف تانى وقول تعليقك بأدب لو سمحت.. وبلاش ألفاظ تلزّقى وتتبلِّى والكلام ده.. تهدف ثورة يوليو إلى إقامة حياة دستورية وديمقراطية سليمة.. حضرتك بتضحك ليه؟
ـ أصلى افتكرت إنها سليمة سليمة.. فاكره لما الكافر فى فيلم فجر الإسلام قال شلت يدى وبعدين ضحك عليهم وقال إنها سليمة سليمة.. آه ياكفرة.. إنها سليمة قال.
■ طيب نكتفى بهذا القدر مع المواطن الكريم لكى نتيح الفرصة لعشرات المواطنين الذين يتسابقون خلف الكاميرا على إبداء رأيهم فى أهداف ثورة يوليو. كفاية كده أنا مش مكملة مع الراجل ده.. ويا رب أتنقل القناة التامنة لو كملت معاه.
ـ المعد: طيب خلاص هدى نفسك يا هانم.. هنمشيه.. بس إنتى إهدى والنبى.
■ إيه ده.. مش ممكن.. ده لسه واقف هنا.. إنت يا أخينا ما تتوكل على الله وتمشى من هنا.. ما خلصنا التسجيل.. إنت واقف هنا ليه؟
ـ مستنى إعادة «الأهداف».

[*نورلان*]

اااااه موتيني من الضحك يا دودي تسلم ايديكي حبيبتي




















مستنية الهدف بقى

[dalal.sobhy]

هههههههههههههههههههههههه
هههههههههههههههههه
ههههههههه
طيب حبيبتي خليكي مستنية..
فاضية ولا وراكي حاجة؟؟؟
فات 58 سنة..
هانت حبيبتي..
إستني زيهم.

[أبو قمر]

يا خبر وانا كنت فاكرها أهداف
أتاري 3 طلعم أوفصايد والحكم كان قابض ( منه لله )
و3 حارس المرمى عداهم بمزاجه ( كان قابض هوه كمان )
بس دا ماتش قديم أوي من أيام الأبيض والأسود
يا الله بكره تتعدل

[Touty Potter]

جميلة جدا يا دودي
انا قريتها في الجرنان وضحكت قوي
بس حقيقي انا حاسة ان الثانوية العامة محاصرانى
اول ما بدأت اقرا لقيت التاريخ بيجري في دماغي
أمال درجتى وحشة في التاريخ ليه؟

عامة الحمد لله انها ما سألتنيش انا
كان زماني دلوقتى بقيت كده

[dalal.sobhy]

المشاركة الأصلية كتبت بواسطة أبو قمر

يا خبر وانا كنت فاكرها أهداف
أتاري 3 طلعم أوفصايد والحكم كان قابض ( منه لله )
و3 حارس المرمى عداهم بمزاجه ( كان قابض هوه كمان )
بس دا ماتش قديم أوي من أيام الأبيض والأسود
يا الله بكره تتعدل

ههههههههههههههههههههههه
ماشي يا أبو قمر..
طيب بقى لنا كام سنة ألوان؟؟؟؟
حوالي 29 سنة؟؟؟
ماتعدلتش ليه؟؟؟
ولا الحكم لسه بيقبض..
وحارس المرمي مش راضي يعديها علي خير؟؟
وبرضه بيقبض؟؟؟؟

[dalal.sobhy]

المشاركة الأصلية كتبت بواسطة Touty Potter

جميلة جدا يا دودي
انا قريتها في الجرنان وضحكت قوي
بس حقيقي انا حاسة ان الثانوية العامة محاصرانى
اول ما بدأت اقرا لقيت التاريخ بيجري في دماغي
أمال درجتى وحشة في التاريخ ليه؟

عامة الحمد لله انها ما سألتنيش انا
كان زماني دلوقتى بقيت كده

معلش ياتوتي حبيبتي..
الحمد لله جت علي خير..
إستني مع نورلان وشوفي إعادة الأهداف.

[أبو قمر]

يعني قصدك تقولى ان الابيض والاسود خلاص بـــــح
بقى كله ألوان يا خبر وانا فاكر انه يا أبيض يا أسود
على رأى عادل إمام ( مربة توت إسوووووووود )
والحياة بقى لونها بمبى دا ( مكنش مبدأ من مبادئ الثورة )
وعلى رأى القائل ( أنا كنت فى الحمام ساعتها )
يعنى لو كنت شفت أو سمعت كنت هقول : عظيمة يا مصر

[dalal.sobhy]

أأأأأأأأأأأأأأأأأأأأأأأأأأاة
إنت بقي ماعندكش خلفية!!!!
بـ 3 صاغ تقدر تشتري ماتزوقيني ياماما
صفحة مليون و300 ألف كنت حتعرف
إن الحياة بقي لونها كحلي..
والأبيض والأسود هاجروا علي فرنسا
مع الأقصر وأبو رامي
ههههههههههههههههههههههه
وبعدين فيه حد يدخل الحمام ساعتها؟؟
مش وقته خالص..

ومع ذلك ومهما عملوا في مصر وفينا
ومن كل قلبي بأقول
بحلوك ومرك بحبك يامصر
ومصر حتفضل غالية عليا.

يامصر.

[إمام المنار]

بسم الله الرحمن الرحيم
أختى العزيزه دودى
أضحك الله سنك
وحقيقى شر البلية ما يضحك
لو سمحتى بلاش كلام فى الكوره
أنا رجل ملتحى وربنا يجعل كلامنا خفيف عليهم
فكرتينى بمذيعه إستضافت مواطن وسألته مين موحد القطرين ؟
فأجاب :الملك مينا 000 بتوجيهات من السيد الرئيس محمد حسنى مبارك
على فكره ممكن يكون هو نفس المواطن بعد إذاعة البرنامج

[Touty Potter]

المشاركة الأصلية كتبت بواسطة dalal.sobhy

أأأأأأأأأأأأأأأأأأأأأأأأأأاة
إنت بقي ماعندكش خلفية!!!!
بـ 3 صاغ تقدر تشتري ماتزوقيني ياماما
صفحة مليون و300 ألف كنت حتعرف
إن الحياة بقي لونها كحلي..
والأبيض والأسود هاجروا علي فرنسا
مع الأقصر وأبو رامي
ههههههههههههههههههههههه
وبعدين فيه حد يدخل الحمام ساعتها؟؟
مش وقته خالص..

ومع ذلك ومهما عملوا في مصر وفينا
ومن كل قلبي بأقول
بحلوك ومرك بحبك يامصر
ومصر حتفضل غالية عليا.

يامصر.

أبو قمر عشان ماتحيرش نفسك
متزوقيني يا ماما هتلاقيه عند بتاع الجرايد
انترناشيونال جرنان صفحة واحدة
صفحة مليون و300 ألف
واسم الملحق "قوام يا ماما"
وده عشان ما تدوخش هتلاقيه يوم الخميس بس
وأبو رامي ده التمثال اللى وشه وش انسان
وجسمه جسم أسد
وده هاجر مع الاقصر لفرنسا
أما برج ايفل هتلاقيه في بولاق ابو العلا
لو عايز تزوره يعني
ولغوا الابيض والاسود عامة
بقي ابيض واصفر بس
ههههههههههههه

المشاركة الأصلية كتبت بواسطة إمام المنار

بسم الله الرحمن الرحيم
أختى العزيزه دودى
أضحك الله سنك
وحقيقى شر البلية ما يضحك
لو سمحتى بلاش كلام فى الكوره
أنا رجل ملتحى وربنا يجعل كلامنا خفيف عليهم
فكرتينى بمذيعه إستضافت مواطن وسألته مين موحد القطرين ؟
فأجاب :الملك مينا 000 بتوجيهات من السيد الرئيس محمد حسنى مبارك
على فكره ممكن يكون هو نفس المواطن بعد إذاعة البرنامج

ههههههههههههههه
حافظ مش فاهم
ههههههه
هههه
ه