كل سنة و انت بألف خير ابو قمر

[dolly]

عزيزى المدعو ابو قمر

نوجه عناية سيادتكم الى ان عداد العمر الرجالى التابع لسيادتكم سوف يتشألط بداية من اليوم

و عليه نوجههكم الى الاستعداد بالآتى:-

1- علبة صبغة - ولا بلاش صبغة دى الا بتعمل حساسية عند الشيوخ - خليها باكو حنة ماركة المدينة اسود او بنى لزوم وجاهة الشعر و الدقن

2- كريمات و اسكربات لاخفاء التجاعيد اللى برضه مبتأثرش فيكم باى شكل

3- الاستعداد بجهاز الجرى الرياضى و باكتتين شاى الدكتور مينج الاصلى عشان الكرش الرجالى اللى بيظهر بعد الاربعين مبيروحش ولا بالطبل البلدى

4- الحجز عند خبير فى زراعة الشعر احتياطيا - اذ ربما كمان سنة و متلاقيش الغطاء الجوى بتاعك كمعظم الرجال فوق الاربعين

مش عارفة اقولك يعنى اعمل لاخرتك لانك ما شاء الله تبارك الله من الناس المغسلين و ضامنين جنة طوالى ان شاء الله (ده كفاية الجمعية بتاعتك و مشروعاتها الخيرية اللى ان شاء الله تتوسع و تنافس اشهر الجمعيات بالوطن العربى كله)

كل سنة و انت طيب يا محمد

و السنة الجاية ان شاء الله نلاقيك نطيت من وكيل معهد لشيخ ازهر لوكشة واحدة (و الله مش بعيد.. ما هو زمن عجايب يا عم الحاج)

و طبعا انا مش هاجيب تورتات ولا حلويات زى الاعياد التقليدية

ده عيد ميلاد ابو الكرم كله

عشان كده انا مبيتة من غير عشا انتظارا لوليمة معتادة على حساب صاحب المحل:3_8_128:

[أبو قمر]

ماشي يا دوللى مقضياها كلام وبس فعل مفيش
ولعلمك انا معملتش حسابك فى الوليمة
وكانت ليلة جامده لسه خلصانه حالا
المشايخ متعودين كل سنة يجونى
ونقرا قرآن ثم نبدأ مراسم الاحتفال بالوليمة الجامده
وذلك كل سنة بعد صلاة عشاء يوم 1/7
ويتخلل الحفل ابتهالات وأناشيد وأدعية
وقد انضم السلطان عبد الحميد لأسرة المشايخ واصبح شيخا معتمدا
وشارك فى الوليمة الرجالى تاركا وليمة الأطفال لأنه شارك بقراءة 3 أجزاء من القرآن الكريم
شكرا ليكي يا دولى ويارب نجتمع على طاعة الله فى عمره العام القادم ونلتقى عند الحرم الشريف وعند روضة الرسول صلى الله عليه وسلم

[حــاتم الجــارحى]

بسم الله الرحمن الرحيم



أخى الحبيب أبو قمر
مش عارف أقولك إيه ؟
كنت هقول حاجة وكلام دوللى بيجبرنى على كلام تانى خالص
وقطعا للحيرة عايز أسأل
دوللى داخلة تبارك بالعيد السعيد بتمام الأربعين .. ولا داخلة تقول إيه بالظبط ؟ :3_8_123:
عموما ورغم التلميحات المباشرة على من هم فى حزب الأربعين وما بعدها
إلا أنى هفترض حسن النية

كل سنة وأنت طيب يا أفضل وكيل معهد بالأزهر كلاته
وعقبال 100 سنة يا أبو الشباب كله .. رغم تلميحات دوللى

وسمعت أن الشيوخ بيطبخوا ولحمة هُبر هُبر وفتة فى أعياد الميلاد

بس أنا من أنصار التورتات والجاتوه والحاجات الساقعة

http://t2.gstatic.com/images?q=tbn:ANd9GcTFnuWEBe4Z8BahWIo7ELv0qwQ0Nuv99b36xV6O8sjy51o5JTwDbg&t=1

http://img.christian-dogma.com/images/products/873256.jpg



عيد ميلاد سعيد

[أبو قمر]

حبيبى حاتم الجارحى يا مرحبا يا مرحبا نورت عيد الميلاد يا حاج حاتم
غيظا فى اختنا داليا انا كنت مخبى التورتات والجاتوهات والساقع عشان
عامل حساب دخلتك علينا اللى هيا عندنا بالدنيا وطبعا انت عارف إن الشباب بيبدا بعد الأربعين
ولا يهمك من التلميحات مازال الشعر اسمرا رغم عوامل التعرية اللى عملالى قلق جامد
بس هو انا احسن من مين ؟؟؟ فاهمنى طبعا يا كبير ما انت قدوة لى حتى فى تلكم الأمور
ربنا يبارك فيك يا سيادة العقيد ويا عم الحاج ويا كبيرنا ويا منورنا ونفسي تيجي تقعد معايا قاعده جامده
اسيبك بقى وانطلق لصلاة الفجر

[nour elga7ed]

كل سنه وحضرتك طيب

:3_8_177:

ويارب تتم المائه وحضرتك معانا هنا برده
بس بالنسبه للوليمه يعني
أحم احم ^:^

ملناش فيها ولا ايه ؟؟؟؟؟؟

[أبو قمر]

طبعا ليكي فى الوليمة بس
دا يتوقف على
""
""
""
""
""
""
""
""
""
""
""
















علاقتك بداليا بنت خالى
لو اصدقاء يبقى كفايه عليكم تشربم كانز
لو متعرفيهاش اوبن بوفيه وبراحتك ع الآخر

شكرا على حضورك حفل عيد الميلاد نورتينا

[Hania]

أخي العزيز محمد كل سنة و انت سالم و بألف خير و صحة و سلامة و عافية و يجعلك في أبناءك كلهم قرة عين يارب و يعافي بابا و يتقبل منكم يااااااااااااااااااااااااارب
:3_8_161:

صلى الله على محمد صلى الله عليه و سلم
.
.
.

[أبو قمر]

هانيه وصلت يا رجاله
كله يوسع اتفضلى يا هانيه
لا مش هون اتفضلى هناك عند البوفيه
ومتديش لداليا حاجه اصلها بتقول انى بقيت عجوز
حضرتك المسئولة عن البوفيه
على فكرة انتى جوعتى الناس
كل شويه اسمع كلمة البوفيه هيفتح امته
اقول لهم شويه لسه المديره مجتش
حمدا لله على سلامتك ونسأل الله لك التوفيق والنجاح والسداد
نورتى عيد الميلاد

[dolly]

بسم الله الرحمن الرحيم




أخى الحبيب أبو قمر
مش عارف أقولك إيه ؟
كنت هقول حاجة وكلام دوللى بيجبرنى على كلام تانى خالص
وقطعا للحيرة عايز أسأل
دوللى داخلة تبارك بالعيد السعيد بتمام الأربعين .. ولا داخلة تقول إيه بالظبط ؟ :3_8_123:







و الله يا باشمهندس انا داخلة آخد بتار المساكين المقهورات فى الارض اللى عدواالتلاتين زى حالاتى

ما هو اصل انا عارفة و حافظة الاسطوانة اللى بتدوروها علينا فى المرحلة دى

فباقول يعنى لا تعايرنى ولا اعايرك - دى رسالة مباشرة لكل الرجالة و لحضرة الديكتاتوقراطى البيتوتى ابو قمر على وجه الخصوص

و بالنسبة بقى للتصبير اللى بتصبروه لبعض ده فملوش اى داعى لانه برضه مش هيغير فى الواقع الشكلى و العمرى لحضراتكم:3_8_107:

[dolly]

:3_8_124::3_8_124::3_8_124::3_8_124:


كده برضه يا ابو قمر؟ يعنى مش كفاية انى نمت من غير عشا و اتحرمت من الوليمة عشان باقول كلمة الحق و بانصحك لوجه الله؟

كمان تحرمنى من الاوبن بوفيه اللى استمر يومين من بعد العيد ميلاد؟

و كمان عاوز تقلب اصحابى عليا


لا يا بابا لا


احنا اصحاب شعارنا

يا نعيش سوا يا نجوع سوا يا ناكل سوا - و اخص بالذكر هانية اللى واقفة على راس البوفيه

هيه

فين ايام الطفولة و فين العشرة و فين صلة الرحم و فين الكانز اللى شكلى هاشربها لوحدى على جنب؟

[nour elga7ed]

يبقي شكلنا هنجووووووع سواا يا دولي :3_8_107:
هنمشيها كانز وخلاص :3_8_141:

[*نورلان*]

هههههههههههههههههههههههههههههههههههههههههه
يخرب عقلك يا دوللي كل ده شايلاه وساكته .. كنتي قلتي شلنا معاكي شوي ههههههههههههههههههههههه

انا طبعا سبقتكم وعيدت على اخويا محمد على الفيس بوك ومايمنعش اني اجدد المباركة له هنا كمان
كل عام وانت بصحة وسعادة وطاعة ورضا ...هتقولي متاخرة ليه ؟ اقولك اصل كنت منشغلة بحراسة البوفيه حتى لا تأكله دوللي :)

[أبو قمر]

نورلان ....... صح يا ولاد هيا نورلان
اوعى يا ابنى وسع يا عم حاتم شويه كده
اتفضلى يا نورلان جنب هانيه هناك انتى منوره الدنيا
خلى بالك فيه اتنين هنا شكلهم اصحاب جامد
واحده اسمها داليا والتانيه اسمها نور احترسي منهم
فهمانى طبعا بمعنى انهم عندهم حساسيه من اللحوم والجاتوهات
خلى الليله تعدى على خير الوقت متأخر ومش هعرف اجيب لهم أطباء
فمن الآخر كده مشيها لهم كانز بس عشان ميتعبوش وخاصة داليا
عامله دايت وانتى عارفه السن ده لو معملتش رجيم هنحتاج ونش يحركها
نورتى الحفلة يا نور وربنا يبارك فيكي وبعطيكى كل أمنياتك
أختى نور وأختى داليا انتم على راسى أنا كنت بهدى النفوس بس

[إمام المنار]

بسم الله الرحمن الرحيم
أخى الفاضل أبوقمر
كل عام وأنت بألف صحه وعافيه
عشت مديداً ولبست جديداً ومت شهيداً ( جمعا إن شاء الله )
أعتذر بشده عن التأخير ولكن أن تأتى متأخرا خير من أن لا تأتى
أنا لم أدخل المنتدى منذ 31 / 5 لظروف خاصه
على فكره أنا دخلت فى الأربعين من حوالى شهرين
عادى جدا زى شكة الدبوس
شد حيلك ولا يهمك من أى حد
جمعنا الله وإياكم على حوض المصطفى - صلى الله عليه وسلم - لنشرب من يده الشريفه شربة لا نظمأ بعدها أبدا

[nour elga7ed]

حبيبتي نورلان يرضيكي بعد كل ده اطلع بكانز بس ؟؟
وبعدين البوفيه شكله حلو وميرضيكش عيني تبقي عليه ومش انول منه حاجه :3_8_124:
انا هاخد حاجات بسيطه خالص
وطبعا انتي مش هتبلغي عناااا :3_8_141:

[أبو قمر]

أخى الحبيب تامر نورت عيد الميلاد
وحمدا لله على سلامتكم وعمرة مقبوله إن شاء الله
أما بخصوص سن الأربعين وشكة الدبوس فذاك هو المحك
لأننى لم اشعربتلكم الشكه وقد وثق كلامى اساتذه وعلماء فى الطب النفسي
نظرا لأن الأخت داليا جعلتنى أقف أمام المرآة كثيرا فاستشرت علماء النفس
فقالوا من يظن أن من يصل الى الأربعين عجوزا لا شك أنه هرم
أما الشباب الحقيقى فيبدأ من الأربعين ذلكم السن ذا الرونق الخاص
والبريق المتميز !!!!!
فنحن يا أخى الفاضل ( أنا وانت ) فى مرحلة البريق والرونق
وشكة الدبوس تأتى بعد الستين بالتأكيد
اتفضل حضرتك هنا فى صالة كبار الزوار ( مقاما ) هاه
ايوه جنب الحاج حاتم نورت الحفلة يا كبير هواره